कुणी कोडे माझे उकलील का
कुणी कोडे माझे उकलील का ?
हृदयी तुझ्या सखी, दीप पाजळे,
गुलाब माझ्या हृदयी फुलला,
रंग तुझ्या गालावर खुलला,
काटा माझ्या पायी रुतला,
शूल तुझ्या उरी कोमल का ?
माझ्या शिरी धग निळा डवरला,
तुझ्या नयनी पाऊस खळखळला,
शरचंद्र या हृदयी उगवला,
प्रभा तुझ्या उरी शीतल का ?
मद्याचा मी प्यालो प्याला,
प्रिये, तयाचा मद तुज आला;
कुणी जखडीले दोन जीवांला
मंत्रबंधनी केवळ ? का ?
_ भा. रा. तांबे
No comments:
Post a Comment